CEC bantir tumna 'Motion' thar thehlut dawn

Eptu party hrang hrangte chuan Chief Election Commissioner (CEC) Gyanesh Kumar chu a hna aṭanga bantir a nih theih nan Parliament-ah 'motion' thar put luh an tum leh mek tih an sawi.

Tun hnaia Lok Sabha-a sorkar laipui put luh, 'Constitution (131st Amendment) Bill' an lo dan chah tawh avangin eptute hi an phur thar hle a, he motion tharah hian MP tam zawk hming ziak an hmuh tlin an inbeisei a ni. Motion thar hi tun karah hian Parliament-ah put luh hman an tum a, hemi atan hian puhna leh thubuai thar hrang hrangte an buatsaih mek.

Hemi hma hian March 12 khan Rajya Sabha MP 63 leh Lok Sabha MP 130-te chuan CEC ban tura phutna motion hi an lo theh lut tawh a, mahse April 6 khan Lok Sabha speaker Om Birla leh Rajya Sabha chairman C.P. Radhakrishnan te chuan an lo hnawlsak a ni. Presiding Officer-te chuan phek 17-a sei hrilhfiahna siamin, eptute’n CEC an puhnaah finfiahna ṭha a awm tawk lo tih an tarlang.

Sorkar thlawptu lam chuan eptute chet lak dan hi sorkar hnathawh pawimawh tihhmingchhiat a, inthlanpui kalpui chungchanga mipui rinhlelhna siam tumnaah an puh. Hetih laiin eptu pawl hruaitute chuan CEC hian a hna a chelh chhunzawm zel a nih chuan inthlan thianghlim a awm thei dawn lo tih an sawi thung Motion thara an puhna tur thupui erawh an la thup rih. Gyanesh Kumar hi CEC atana ruat dan phung pawh eptu lamin an lo sawisel tawh a ni.