AAP-in Raghav Chadha security titawp, sorkar laipuiin Z security pe

Pubjab-a Aam Aadmi Party (AAP) sorkarin Rajya Sabha-a an party deputy leader an thlak tak, Raghav Chadha hena Z+ security a pek chu a titawp a; mahse, BJP kaihhruai sorkar laipui chuan Chadha hi Punjab leh Delhi-ah Z caterogy a pe zui nghal.

Union ministry of home affairs chuan thuchhuah siamin, central security agency-te nena an ennawn hnuah Chadha security pek dan tur hi an siam nghal tih a tarlang. Punjab leh Delhi bikah Z security pek a ni ang a, a bak ram chhung hmun dangah chuan Y category security pek a ni thung ang.

Z category security pek hi National Security Guard emaw, Central Reserve Police Force emaw trained commando 22 ten an veng a, bullet-proof motor pek tel an ni bawk. Office leh an zin chhuahna bakah, an chenna in pawh darkar 24 chhung ven sak an ni.

AAP sorkar hian Rajya Sabha-a party deputy leader aṭanga Chadha ban a nih tukah security pek hi a titawp nghal a, a tihtawp chhan hi a sawi lang lo. Chadha thlaktu atan hian Lovely Professional University (LPU) neitu, Ashok Mittal an ruat a ni.

Mittal hi Rajya Sabha-a AAP deputy leader atana ruat a nih hnu lawkah, Enforcement Directorate (ED) chuan a chenna in leh a sumdawnna hmun hrang hrang, Lovely Group nena inzawmna neihte an dap zui a ni. Mittal-a sumdawnna hmun dapsak a nih ni vek hian sorkar laipui chuan Chadha security pek a nih thu hi a puang zui bawk. Chadha hi an party hotute nen an inkar a ṭha vak lo nia sawi a ni a, Rajya Sabha-a deputy leader aṭanga ban a nih hnuah Chadha hian video tichhuakin, an party chu a lo sawisel tawh bawk.