RS Deputy Chairman atan chuhtu awm loin Harivansh tling

Rajya Sabha Deputy Chairman chu Nilaini khan thlan a ni a, NDA candidate Harivansh chu chuhtu awm loin a tling. Deputy chairman hi term thum a chelhna tur a ni.

Harivansh hi April 9-a a term a tawp hnuah, president Droupadi Murmu chuan Rajya Sabha member atan hian a ruat leh a ni. Rajya Sabha-a ‘nominated member’ zinga Deputy Chairman hna chelh hmasa ber a ni ta a ni.

Prime minister Narendra Modi chuan Harivansh chu lawmpuina hlanin, “A vawi thumna atana he hna chelh tura thlan a ni hian House-a member-te rin a hlawhzia a lantir a ni,” a ti. Harivansh chu chanchinbumi, 'journalist' hlui a nih anga thil kalhmang hria a nihna leh mahni bial hmasawnna fund-te riruang nei taka university-a research tihna atana a hman ṭhinte chu fakawm a tih thu a sawi bawk. Congress president Mallikarjun Kharge pawhin lawmpuina hlanin, House-ah eptu lamte pawh hun ṭha leh bituk fel tak siamsak hram hram turin deputy chairman thar hi a ngen.

Hetih lai hian Trinamool Congress (TMC) leh Samajwadi Party member-te chu inthlan neih a nih chungchangah lungawi loin, inthlanna neih lai hian House an chhuahsan, TMC MP Derek O’Brien chuan, “Lok Sabha-ah kum sarih chhung Deputy Speaker thlan a la ni lo a, Assembly inthlan neih lai renga Deputy Chairman thlan kan hmanhmawh viau hi a mak hle a ni,” a ti.