KDA-in 6th schedule leh Statehood phut chhunzawm

Ladakh-in state puitling nihna leh Sixth Schedule hnuaia awm a phutna vanga sorkar laipui nena an inbiakna a tlawlh hnuah, Kargil Democratic Alliance (KDA) chuan an thil phutah an la din ngheh reng thu an tichiang nawn leh.

KDA co-chairman Asgar Ali Karbalai chuan Ladakh mipuite duhdan leh an dikna humhalh a nih theih nan 'Statehood' leh 'Sixth Schedule' aia hnuaihnung chu engmah an pawm dawn lo tih a sawi. "Heng thil pahnihte hi Ladakh mipuite nihna leh an tana pawimawh berte an ni a, sorkar laipui pawh hian mipuite thuchhuah hi a ngaih pawimawh a ngai a ni," a ti.

MHA leh Ladakh hruaitute hi February 4 khan inbe tawhin, hemi ṭum hian Home Ministry chuan Statehood leh Sixth Schedule chuan sum leh paiah harsatna a thlen thei tih chhuanlamin an thil ngiat hi a lo hnawlsak tawh a ni. Sorkar chuan an thil phut aiah hian 'Territorial Council' siam mai a rawt a,Ladakh hruaitute chuan an lo hnar a ni.

KDA hruaitu Sajjad Kargili pawhin sorkar laipuiin an thil phut hi a bawhzui duh loh hmel hle tih sawiin, "Council tihdanglam emaw, thuneihna tlem tlem pek belh ringawt hi kan lungawi tawk lo. Kan thil phut tak tak kan hmuh hma chu kan nawr zel dawn a ni," a ti ve bawk. Ladakh-a pawl hrang hrangte leh sorkar laipui inbiakna hi a tawp rih a, sorkar chuan ni 15 chhunga inbiakna neih leh tura a tiam pawh thla hnih dawn a ral leh tawh a ni.