Hormuz-a lawng veivahna muanawm siam turin India-in UN ngen

India chuan Ningania UN General Assembly neihah, Strait of Hormuz-a sumdawnna lawng veivahna daltu leh beitu an awm ṭhin chu a dem thu leh, hei hi pawm theih a nih loh thu a sawi.

UN-a India ambassador,Harish P chuan 'The Situation in the Middle East' tih thupui hmanga sawi hona neihah hemi chungchang hi sawi chhuakin, tuipui lam himna chu India energy leh economy tana thil pawimawh tak a nih thu a sawi. Harish chuan, "Strait of Hormuz-a sumdawnna lawngte beih an ni hi India chuan a dem hle a, he tuipui kawng pawimawh takah hian zalen taka sumdawnna leh veivahna 'freedom of navigation' a awm leh thuai kan beisei a ni," a ti.

India chuan West Asia buaina leh, Strait of Hormuz-a harsatna thlengin khawvel pum sumdawnna a nghawng dante leh, India mi lawnga hnathawkte nunna hial lak a nih tawh dante a tarlang bawk. Buaina avanga civil mite tana hlauhawm thlen thei thilte pumpelh tur leh, ram hrang hrangte chu inremna zawng turin a ngen bawk.

Strait of Hormuz hi khawvela oil chawk luhna tui kawng pawimawh tak a ni a, UN Trade and Development (UNCTAD) tarlan danin, West Asia buaina a chhuah hnuah lawng veivahna chu 95% zetin a tlahniam a ni. February khan ni khatah lawng 130 vel nitin an kaltlang ṭhin laiin, March-ah chuan ni khatah lawng 6 chiahin an paltlang tawh. UN secretary general Antonio Guterres pawhin he hmun hi "hrek beh" a nih chuan mi rethei zawkte tan khawsak a harsa dawn tih a lo sawi tawh bawk a ni.