Mamata-i’n Bengal-a President Rule hman tumah BJP puh

West Bengal chief minister Mamata Banerjee chuan Ningani khan thuchhuah siamin, Malda-a thil thleng chu BJP-te ‘game plan’ a nih thu leh, hemi hmang hian sorkar laipui chuan an state-ah President Rule hman an tum niin a sawi. Nilaini khan Malda district-a Mothabari BDO office-ah tualchhung mite chuan Special Intensive Revision (SIR) neih laiin judicial officer pasarih an hreng a, he thil thleng avang hian khawtualah boruak a sosang hle a, police leh security force-te’n officer-te hi an venghim hman a ni.

Murshidabad district-a inthlan campaign-a thu a sawinaah, Mamata chuan he thil thleng hi amah tihhmingchhiat nana duan lawk a nih thu tarlangin, "He thil avang hian West Bengal hming a chhia a, inthlan tihtawp emaw state sorkar thuneihna hlihsak emaw an tum a ni. He thangah hian tlu lut lo turin mipui ka ngen a che u," a ti. Election Commission (EC) pawh bei zuiin, "Kei chuan thuneihna ka nei tawh rih lo, thil engkim hi EC kuta awm a ni a, an thiam loh a ni," tiin CM chuan officer-te himna pe thei loah a puh.

BJP lam pawhin thuchhuah siam ve nghalin, Trinamool Congress (TMC) sorkar chu mipui fuihpawrhah an puh ve thung. BJP state thupuangtu Debajit Sarkar chuan, "Inthlan hmaa hming dik lo nuai 120 chuang paih a nih avangin TMC hi an chiai a, chuvang chuan hetiang hian buaina an chawk chhuak a ni," a ti.

Supreme Court pawhin he thil thleng hi pawi a tih thu leh, West Bengal sorkar chu judicial officer-te himna ngai pawimawh loah a lo puh ve bawk. Buana chhuak avang hian BJP chuan TMC sorkar chu 'dan leh hrai awm lohna' tia chhalin, CM Mamata chu a hna aṭanga bang tur hian an phut zui bawk.