India-in chhiah a la sang lutuk : US Trade Report

United States Trade Representative (USTR) chuan kum tina a tihchhuah ṭhin, ‘National Trade Estimate (NTE) Report on Foreign Trade Barriers’ chu Thawhlehni khan a tichhuak. Report-ah hian India-in ram pawn aṭanga a bungraw chawk luh aṭanga chhiah (duty) a lak dan leh harsatna a siamte chu na takin a sawisel a, chhiah a sang lutuk a ti. India sorkar erawh chuan an chhiah lak dan zawng zawng hi World Trade Organisation (WTO) dan leh hrai nena inrem vek a ni tih a sawi ve thung.

Report chuan India-in hmun hrang hranga internet a tihtawp ṭhin leh digital payment chungchanga dan khirh tak a neihte chu sumdawnna tibuaitu pakhat a ni tih tarlang bawkin; chhiah bakah hian thil lak luh phalna (licensing), Quality Control Orders (QCOs), leh India-a endikna (testing) khirh tak takte hian US sumdawngte tan harsatna a siam nasa hle tih a tarlang.

India chuan thlai thar, damdawi, leh zu (alcoholic beverages) aṭangin chhiah a la sang hle tih tarlan a ni a, zu-ah 150%, apple leh motorcycle-ah 50%, leh thlai hnah hrang hrangah 100% thlengin chhiah a lak thu an tarlang. India hian kum tina budget thar a tihchhuah rualin chhiah lak dan a thlak thin a, hei hi sumdawngte tan hriatthiam a har bakah rin lawk a harsat ṭhin thu US chuan an sawilang bawk.