Karnataka-in naupangte digital ngawlveina venna tur policy duang

Zirlai naupang ten digital technology him tawk lo an hman nasat zel avangin, Karnataka Department of Health & Family Welfare chuan NIMHANS (National Institute of Mental Health and Neurosciences) leh stakeholder dangte thawhpuiin, naupangten digital ngawl an vei theihna laka venna tur policy an duang. Hei hi naupangte nungchang leh an rilru lam hriselna atana tih a ni.

Draft policy hi zirchianna an neihah tleirawl pali zinga pakhat zelin internet an hman nasat avanga harsatna an nei tih hriatchhuah hnuah siam a ni. Thuneitute chuan online nasat hian anxiety, mut ṭhat loh, zirna lama inthlahdah leh inlakhranna a thlen nasa tih an sawi. Naupangte an online nasat chuan cyber bullying pawh tawk thei reng an ni tih an sawi bawk.

Policy an duanah hian digital hman dan tur chungchanga ruahmanna siamin, inzirtirna ṭha pek a, rilru lam hrislena pawimawhna inzirtir, education system-ah cyber safety chungchang lak luhte an telh. Hmalaknaah hian stakholer hrang hrang, school, zirtirtu, nu leh pa, zirlai naupang bakah sorkar hnuaia pawlte an tel a ṭul thu an tarlang bawk a ni. School te chu digital hman dan turah policy duang turin tih an ni a, ni khatah screen time darkar khat aia tam lo siam tur te leh, online lama khawsak dan dik lote inzirtir tura tih an ni. Zirtirtute chu naupangah digital ngawlvei an awm leh awm loh rang zawka an hriat theihna turin training pek an ni dawn. He policy kalpuina tur hian school level-ah Digital Wellness Committee din a ni bawk ang.

Thuneitute chuan an policy duan hian naupangteah digital lam hriatchianna a siam bakah, techology ngawlveina a tihtlem theih an beisei tih an sawi.