Ui kaihna tel loa chhuah tirte cheng 1,000 chawi tir dawn

Lok Sabha-a Jan Vishwas Bill, 2025 bill putluhah, Delhi Municipal Corporation Act, 1975 hnuaia Delhi khawpui huam chhunga ran vulh khawlaia chhuahtir ṭhina pawisa chawitir Rs 50 ni ṭhin chu Rs 1,000 a tihpun rawt a ni. Hei hian ui kaihna tel loa chhuah tir a huam tel a ni.

Bill hi minister of state for commerce and industry Jitin Prasada chuan Lok Sabha-ah Zirtawpni liam ta khan a pharh a ni. Bill-ah hian vantlang kawnga bawng vulh lai tlattir avanga pawisa chawi ṭhin, Rs 100 pawh Rs 1000-ah hian tihsan rawt bawk niin; hei bakah house number tihchhiat emaw tihdanglam emaw avanga pawisa chawi ngai ṭhin pawh Rs 50 aṭangin Rs 1000-ah tihsan rawt a ni bawk. Hei bakah chhan hrang hrang avanga pawisa chawina pawh tihsan a nih beisei a ni bawk.

In sak chungchangah hmun hlauhawm laia in sa, thupek tihchhuah hnu pawha zawm lote sum chawitir ṭhin chu Rs 200 aṭangin Rs 1000-ah tihsan a ni dawn a; hetiang chiah hian phalna nei loa in sate pawh Rs 1000 chawi tir an ni tawh dawn a ni. Hei bakah section 465 bawhchhiat avanga pawisa chawi mumal awm lo ṭhinah pawh Rs 500 chawi a ngai tawh dawn a, pawisa chawi pek loha nitina chawi belh tur zat Rs 20 a tihpun ṭhin chu Rs 50 a ni tawh dawn a ni.