India-in Sri Lanka-ah tuialhthei MT 38,000 thawn lut

West Asia buaina avanga khawvel hmun hrang hranga oil chawk luh a khaihlak mek laiin, India chuan a ṭhenawm ram Sri Lanka hnenah tuialhthei metric ton 38,000 a thawn tih Colombo-a Indian High Commission chuan Inrinni liam ta khan thuchhuah siamin tarlang. Prime minister Narendra Modi leh Sri Lanka president Anura Kumar te March 24 a telephone kaltlanga inbiak hnuah oil hi thawn a ni.

Sri Lanka hnena tuialhthei thawn luh hi petrol MT 20,000 leh diesel MT 18,000 niin a vaiin MT 38,000 a ni. Sri Lanka IOC chuan March chhung daih tur tuialhthei hman tur chu West Asia leh Singapore aṭanga chawk luhsa a nih thu a tarlang a, mahse, hun rei zawk daih tur chu supply-tute lam aṭanga harsatna awm avangin lei theih a ni ta lo tih a tarlang.

Hei vang hian Sri Lanka chuan India hnenah an mamawhna zualpui phuhru turin tuialhthei pe turin an dil a ni. India sorkar chuan Lanka IOC kaltlanga tuialhthei thawn hi a remti a, a theih anga puih zel pawh a tum thu sorkar thuchhuah siamah an tarlang bawk.