April 1 aṭangin ATM dan thar hmang ṭan dawn

India rama bank hrang hrangte chuan kumin April 1 aṭangin ATM kalphung thar hman a nih tur thu an tarlang a, hei hi cash-a pawisa hman tihtlem leh digital banking hman lar theihna tura atana ruahman a ni.

HDFC bank chuan thuchhuah tharin, ATM card hmang loa UPI (QR Code scan) hmanga pawisa lakchhuahah pawh fee chawi a ni tawh dawn tih an tarlang. HDFC hian dan thar hman hma hian UPI hmanga ATM a pawisa lak chhuahah hian fee an la ngai lo a, mahse April 1 aṭang chuan pawisa lak chhuah theih free limit a pelh hnuah pawisa chawi belh hi a awm tawh dawn thung.

Transaction charge hi thla khat chhunga a thlawna ATM hman theih zat hman zawh hnuah chawi a ngai dawn a, free a hman theih zat a zawh hnuah ATM aṭanga pawisa lak chhuah apiangin Rs 23 chawi ziah a ngai tawh dawn a ni. Hei bakah hian bank ṭhenkhatah chuan nikhata ATM aṭanga pawisa lak chhuah theih zat chu tihtlem a ni dawn a, Punjab National Bank chuan card pakhata Rs 1,00,000 lak theih chu Rs 50,000-75,000 ah a tihniam tawh dawn bawk.