Statehood & 6th Schedule pek phutin Ladakh-ah lungawi lohna lantir

Ladakh-a Kargil leh Leh district-ah Statehood leh sixth schedule pek phutin nimin khan lungawi lohna lantir a ni. Lungawi lohna lantir hi Leh Apex Body (LAB) leh Kargil Democratic Alliance (KDA) bultuma neih a ni a, Kargil-ah hian shutdown neih a ni bawk.

LAB hruaitu Glenphunchok chuan mi 7000-8000 bawr an pun khawm theih thu sawiin, nikum September thlaa Ladakh-a statehood leh 6th schedule pek phuta nawrhna neiha buaina chhuah vak hnua ralmuang taka punkhawm huiahawt leh hmasakna ber a nih thu a tarlang. Nikuma buaina chhuakah khan mi pali an thih bakah mi 80 chuangin police silai hmehpuah avangin hliam an tuar a ni.

Pungkhawmte hi hnam thuam inbelin Singay Namgyall Chowk aṭanga Leh Polo Ground thleng kawng an zawh. 6th Schedule leh State-a hlankai thute an aurualpui a, Union Territory-a dah an ni chu thil pawm theih a nih loh thute an sawi bawk. Nikuma Leh-a lungawi lohna lantirna hmuna tharum thawhna chhuak chungchanga judicial commission chhuichianna a rang lamah tihchhuah an phut thu an tarlang. Hei bakah hian nikuma buaina chhuak avanga man, activist Sonam Wangchuk chhuah a ni chu lawmawm an tih thu an tarlang tel bawk.