EC-in West Bengal chief secretary leh police hotu thlak

West Bengal assembly inthlan neih hun tur puan a nih hnu lawk, Pathianni zan khan Election Commission of India (ECI) chuan state chhunga top bureaucrat-te a siksawi nghal. Chief secretary Nandini Chakravorty thlakin a aiah Dushyant Nariala, IAS officer 1993 batch a dah a, Chakravorty chu inthlan kaihhnawih engmah khawih thei lo turin a dah.

ECI chuan state police ho tu, Peeyush Pandey thlakin Siddah Nath Gupta a dah thar a, Kolkata police commissioner Supratim Sarkar chu sawnin, Ajay Kumar Nand a dah bawk. Hei bakah West Bengal home secretary Jagdish Pradad Meena pawh a sawn bawk a ni.

West Bengal-a rorellai, chief minister Mamata Banerjee kaihhruai Trinamool Congress (TMC) chuan Election Commission thiltih dan chu na takin an sawisel nghal a, nimin tlai khan lungawi lohna an lantir a ni. Inthlan dawna EC-in an state top bureaucrat-te a siksawi vak chu a lungawi thlak loh hle tih an sawi a, EC thiltih avang hian nimina Rajya Sabha rorel inkhawmna aṭangin TMC member-te an chhuak tau bawk.

TMC MP Derek O'Brien chuan EC chuan thuneihna an nei tih chu an hria a, mahse, assembly inthlan an neih hun tur puan a nih hnu lawk, Pathianni zan rei tawh taka principal secretary leh home secrtary te sawn an ni nghal rum rum chu an hriatthiam loh thu sawiin, BJP chuan West Bengal inthlan neih tura chak ngei tumin a thuneihna dik lo takin a hmang niin a puh. MP dang Shatabdi Royh chuan, "BJP chuan chak tumin a hmanrua neih zawng zawng a hmang mek a, sorkara thuneihna pawh dik lo takin a hamng a ni. Chief Secretary sawn a nih chhan pawh hei vang hi a ni a, mahse mipuite chuan Trinamool lam an ṭang a ni," a ti. Hetih lai hian EC chuan state inthlan neih tur inbuatsaih dante an thlir hnuah, officer-te hi sawn an nih thu tiin a sawi ve thung. Officer an sawnte hi nimin chawhnu dar 3 aia tlai lohah an post thara in report nghal turin a ti a ni.