Maharashtra-in tuialhthei chatlak lohna turin hma la

Israel leh Iran inkar buaina chhuakin zual lam a pan zel hnuah Maharashtra sorkar chuan state chhunga tuialhthei supply a chatlak mai lohna turin hma a la. West Asia buaina avang hian ram chhung hmun hrang hrangah tuialhthei khaihlak mai hlauhna a darh nasa hle a, hengte avanga buaina chhuak thei tihziaawmna tur hian stat sorkar chuan hma a la zui ta a ni.

Thuneitute chuan district ṭhenkhata Oil Marketing Company(OMC) te chu sorkar leh emergency lirtheite tana hman tur oil dah hrang tur hian a hriattir a ni. Oil dahṭhat hi hun harsa zawk a lo thlen thulha lo inven lawkna atan leh global supply buai palh pawha emergency hnathawh turte a ngawng buai lohna atana ruahman a ni.

Vantlang zinga inrinsiakna hrang hrang a awm luih luih karah, chief minister devendra Fadnavis chuan mipuite chu panic buying nei lo turin a chah nghal a; hemi rual hian an state-ah petrol leh diesel-te chu chatlak mai thei dinhmunah a din loh thu a tichiang nghal. Maharashtra-ah hian vawiin aṭangin budget session ṭan a ni dawn a, tuialhthei chungchang pawh hi topic hit ber pawl a nih a rinawm.

Fadnavis chuan oil lei chungchangah India sorkar chuan buaina tawk lo turin chawk luhna tur a dap zui reng tih a tarlang a, tun dinhmunah India chuan oil mamawh ang chu ni 50 chhung daih dah khawlsa a nei tih a sawi lang bawk. West Asia buaina leh, Iran-in Strait of Hormuz a khar avangin oih phurtu lawng hrang hrangten harsatna an tawk a, oil man pawh a san phah tawh a ni.