Gulf bial aṭangin India mi 52,000 rawn haw tawh

Ministry of External Affairs chuan West Asia-a buaina thleng vangin Gulf bial aṭangin India mi 52,000 chuang chu him takin an rawn haw tawh tih a sawi. West Asia leh Gulf bial dinhmun chu uluk taka an thlithlai reng thu a tarlang bawk.

MEA thupuangtu Randhir Jaiswal chuan West Asia-a India mi awm mekte himna chu sorkar laipuiin a ngaihpawimawh thu sawiin, theihtawpin hma a la reng a ni, a ti. Gulf ram hrang hranga India mi awmte chu an awmna rama Indian embassy leh consulate te thurawn ngaihven reng turin a chah a, embassy leh consulate-ah hian 24x7 helpline dah vek an ni, a ti. Hei bakah harsatna tawk chhungkua leh mimalte dinhmun chhuizui turin Special Control Room pawh siam a ni, a ti.

Thuchhuah an siamah, MEA chuan Middle East-a inbeihna thleng vanga airspace khar chu kar liam ta chhung khan a ṭhen azar hawn a ni a, hemi chhung hian India leh ram dang airlines-te chuan commercial flight bakah non-scheduled flight an tir a, hemi hmang hian India mi tam takte chuan Gulf bial hi an chhuahsan thei tih a tarlang. Thlawhtheihna dang pawh a la thlawh belh dawn tih a sawi bawk. Commercial flight tirh lohna rama awmte chu embassy/consulate te be pawp[ a, an hnaih ber commercial flight awmnate zawt ṭhin turin an chah a ni. Sorkar laipui chuan Gulf bial ram hrang hranga India mi cheng leh hnathawka awm hi mi vaibelchhe khat dawn an tling niin a sawi.