West Asia buaina debate neih phutin eptu party-in lungawi lohna lantir

Parliament Budget session thawh hnihna chu nimin khan neih ṭan leh a ni a, session ṭanni hian eptu party MP hrang hrangte chuan house-a West Asia buaina chungchanga debate neih phutin lungawi lohna an lantir nghal. Eptu pawl MP-te hi parliament complex Makar Dwar chhungah pungkhawmin, rorel lai NDA sorkar chu West Asia buaina chungchanga a ngawih reng avangin an dem thu an tarlang.

Lungawi lohna lantirna hi Congress party president Mallikarjun Kharge bakah Rahul Gandhi, leh Akhilesh Yadav-ten an kaihruai a ni. Kharge chuan X-ah US leh Israel in Iran an beihna chu a ruh lang rawta sawi hona neih phut a nih thu a tarlang. External affairs minister aṭanga side khat chauh thlira thuchhuah siam chu harsatna chinfelna a nih loh thu a tarlang bawk. Eptu pawlte chuan thil thleng chungchangah hian ram mipuite rinna neih theihna tur siam a ṭul hle tih an sawi.

Pungkhawmte hian banner "Gulf ram a buai, oil a nghawng. India mite an tang. India-in hruaitu ṭha a mamawh, ngawi reng lo tur" tih inziaknate an ken lan bakah, prime minister Narendra Modi kaihhruai sorkar duh lohnate hmangin aurualnate an nei nghal bawk. Eptu pawl hruaitute hian ram hruaitute chu mipui tana thil ṭha tur zawk ngaihtuah tur hian an phut thute an tarlang bawk.