US-i'n India hnenah Russia oil lei remti

West Asia huam chhung ram a buai mek avangin US chuan India-a oil thlitfimna company-te chu ni 30 chhung atan Russian oil lei a phalsak. US Treasury Department chuan nimin khan India hnenah hian phalna a pe tih treasury secretary Scott Bessent chuan a puang.

Bessent chuan West Asia buaina avanga khawvel hmun hrang hranga oil khaihlak a awm lohna turin India oil thlitfimna company-te chu Russia aṭanga oil lei chu remtihsak an ni a; hun rei lote chhunga Russia oil lei chuan sum leh paiah hlawkna lian tham a thlen phah dawn lo tih X kaltlangin a tarlang. Hei bakah India-in Russia aṭanga oil a lei theih chuan Iran-in energy hmanga khawvel hrek a tumna tihnep theihna kawng a ni tih a sawi bawk.

US hian India-in Russia oil a lei avang hian US-a India bungrua thawn luha chhiah lak chu a lo tihsansak tawh a, hei hi Ukraine leh Russia inkar buaina chhuak meka sum hmanga Russia a puihna angah a ngaih vang a ni. Hei vang hian India chuan Russia oil chawk luh chu zawi zawia titlemin, West Asia huamchhunga Gulf ram leh US hnen aṭangin oil lei hi a tipung chho mek thung. Mahse, West Asia lam an buai leh tak avangin US chuan temporary-in Russia oil lei hi a phalsak leh ta a ni.