IAF thlawhtheihna chesualah pilot pahnih thi

India Air Force thlawhtheihna, Su-30 MKI fighter jet chu Ningania Jorhat airbase aṭanga a thlawh chhuah hnu rei loteah chesualin a tla a, pilot pahnih Squadron Leader Anuj leh Flight Lieutenant Purvesh an thi. IAF fighter hi Kargi Anglong district, Assam-ah a chesual tih nimin khan IAF chuan a tichiang chauh a ni.

Pilot thi zinga pakhat zawk Flight Lieutenant Parvesh hi India-in Pakistana firfiak pawl laka beihpui a thlakna, 'Operation Sindoor' ah pawh khan tel vein, ram tana mi inpe tak a nih thu a pa Ravindra Duragkar chuan a sawi. Su-30 MKI hi Jorhat airbase aṭang hian training atana thlawk chhuak a ni a, an thlawh chhuah aṭanga rei lote hnuah radar aṭangin hmuh theih a ni lo zui nghal.Official chuan thlawhtheihna hi Karbi Anglong district huam chhung, Jorhat airbase aṭanga km 60 a hlaah a tla tih a tarlang.

SU-30MKI hi Russia siam niin IAF-in fighter jet an neih zinga tunlai leh changkang ber pawl a ni a; twin engine, multi-role aircraft design a nih bakah boruak leh lei lam beihna atan pawha ṭangkai tak a ni. NATO chuan he thlawhtheihna hi a hming lemah"Flanker" tih an vuah a ni.

Union defence minister Rajnath Singh chuan chetsualna thlenga thi chhungte a tawrhpui thu X ah tarlangin, an huaisenna leh ram tana an inpekna chu a hriatreng tawh tur thu a tarlang. Pilot thi chhungte chu an lusunnaah ram pumin an tuarpuiin an tan an din tlat thu a tarlang tel bawk.