J&K police-in lungawi lohna lantirte lakah hma la dawn

Iran supreme leader Ayatollah Ali Khamenei thihna avanga Jammu and Kashmir-a lungawi lohna lantira pungkhawmte'n buaina hrang hrang an chhawh chhuah zui avangin, J&K police-te chuan buaina siamte laka action na taka lakah an vau. Lungawi lohna lantirnaa buaina chhuakah mi 12 an hliam a, an zingah hian police panga an tel.

Khamenei thihna avanga lungawi lohna lantirna avang hian J&K hmun hrang hrangah buaina a chhuak zui a, kawngzawhte hi police-in lo dangin, pungkhawmte hian security duty-te chu lungin an tawng zui a ni. Police-te chuan pungkhawm hnawh darhna tur hian tear gas leh tiang an hmang ve bawk.

Police-te hian ralmuang taka lungawi lohna lantir chu an zah hle thu sawiin, hetih laia buaina chawk chhuak leh tharum thawhna lam zawnga hmalakna erawh an en liam theih loh thu an tarlang. Middle East buaina chhuak avanga mipuite lungawi lohna chu thil awm a nih thu sawiin, buaina leh tharum thawnaa inhnamhnawihte lakah erawh na taka hma lak a nih tur thu an tarlang.

J&K-a buaina a chhuah hnuah Valley huam chhungah lungawi lohna lantir zawnga hmalak khap zui nghal a ni. Pathiannia Lal Chowk-a mi tam tak lungawi lohna lantira an punkhawm hnuah, police-te hian Lal Chowk-ah hian khuahkhirhna an kalpui nghal a, mobile internet service pawh khuahkhirhna siam a nih bakah zirna in hrang hrang chu ni hnih chhung khar a ni zui bawk.