India-in US aṭangin trade deal ṭha ber neih tum: Trade Minister

India leh US chuan insumdawn tawnna neihna tura inbiakna chu kalpui chhunzawm zelin, US president Donald Trump chhiah lak dan tur chu ngaihchan mek a nih thu union trade minister Piyush Goyal chuan nimin khan a sawi. Goyal chuan South Asian ram zingah India chuan a elpui ramte aia ṭha zawk inremna neih a tum thu thuthar lakhawmtute hmaah a sawi a ni.

Trade minsiter Goyal chuan US secretary of commerce Howard Lutnich chu Ningani khan chawhchhun a ei pui a, thawh dunna tur hrang hrang kalpui dan turte an sawi dun nghal. Lutnick nen hian sumdawnna bakah economic huanga thawh dunna turte an sawi dun bawk. India chuan a ṭha ber tura US nena inremn neih a tum a nih thu a tarlang.

President Trump hian kartir lam khan ram hrang hrang, US nena inbiakna nei tawhte chu in hnukdawk lo tur hian a lo vaukhan tawh a, hei hi US supreme court-in chhiah lak dan hrang hrang a lo tihchhuah tawhte a tihtawp sak vang a ni. Hemi hnu hian Trump hian chhiah lak dan tur hman lailawk tur chu 10% ah bithliah a siam thar a, India lakah pawh he hmalakna thar hi kalpui a ni bawk.

India leh US trade deal neih tur peih fel a nih hun tur a sawi theih a nih mai loh thu Goyal chuan tarlangin, ram pahnihte hian March thla chhung hian dan lama tihfel ngai awmte tihfel hman an tum thu chiah a sawi lang. US supreme court in Trump-a chhiah lak dan ruahmanan a tihtawp sak avangin India leh US-in trade deal siam tura inbiakna an an neih chhunzawm tur pawh a tibahlah a, inbiakna nei tura India aiawhte US kal tur pawhin an ṭhulh phah a ni.