State power regulator ranking-ah Punjab che ṭha ber

Ministry of Power thlawpna hnuaia Power Foundation of India (PFI) leh REC Limited thawk dunin Rating of Regulatory Performance of States and Union Territories 2025 report an tihchhuahah, India ram state zingah Punjab power regulator chu a che ṭha ber.

Tehna siamah Punjab State Electricity Regulatory Commission (PSERC) chuan mark 100 aṭangin mark 97 a hmu phak a ni. Mark 96 hmutu Karnataka leh mark 94 hmutu Maharashtra state ten an dawt. Hna thawk ṭha lo berte chu Jammu and Kashmir, Uttar Pradesh, Delhi, Rajasthan leh Tripura te an ni.

Tun ṭum hi ram pum huapa power regulatory performance ranking siam hmasak ber a ni a, state leh Union Territory 11 chu 'A' category-ah dah an ni a, 'B' ah leh 'C' ah 10 ve ve awmin, 'D' ah pali leh 'E' category-ah pakhat a awm bawk.

Report-ah hian power regulator hi tehna panga - resource ṭhat dan, long-term power supply lamah a rintlak em, sum lam dinhmun, khawsak a tihawlsam phah em, energy pek chhuah dan leh inrelbawl dante hmanga teh an ni. Hengte hi March 31, 2025 thlenga regulator aṭanga information an dawn te, bill siam dan bithliahte, order tihchhuah hmangtein an siam a ni. Tehna siamah Tripura state chu a che ṭha lo ber thung a, 36-na niin mark 100 aṭangin mark 21.50 chiah a hmu pha a, 'E' category-ah amah chauh hi dah a ni.

Report-ah hian state leh UT-a power regulator te hnathawh dana rating siam chu india power sector thuam chakna leh tihhmasawnna tura hmalakna pawimawh tak a nih thu tarlan a ni. Tehna an siam chu boruak ṭha lo zawnga inelna thlenna tur ni loin, inzir tawn a, a ṭha ber leh rintlak ber tur an hriat theihna atana tih a nih thu te, ram pumah consumer-te dah pawimawh hmasak ber a pawimawhzia pholanna turte a nih thu an sawi. Kaihhruaina ṭha zawk siam chuan power supply rintlak leh tlawm zawk a siam thei dawn a, investment pawh tam tak an hip lut thei dawn a, India-in clean energy atana a hmathlir neihte tihhlawhtlinna kawngah pawh a pui thei dawn a ni, a ti.