Rashtrapati Bhavan-ah Rajagopalachari lim dah

Prime minister Narendra Modi chuan Pathianni khan Rashtrapati Bhavan-a British architect, Edwin Lutyens lim dah chu thlakin, a aiah India ram zalen hnua Indian governor-general hmasa ber, C. Rajagopalachari lim dah a nih tur thu a sawi hnuah, nimin khan president Droupadi Murmu chuan lim hi a khuh hawng nghal. Rajagopalachari lim hi presidential estate-a Central Courtyard-ah dah a ni.

PM hian Pathiannia radio programme, 'Maan Ki Baat' a hmanaah Azadi Ka Amrit Mahotsav-ah a hmalakna tur panga, Panch Pran sawi langin, heng zingah hian British-in a awpna hnuaia awm lai ang rilru, colonial mindset neih tlat aṭanga zalenna turte a tel. India-in zalenna a hmuh aṭanga kum 78 hnuah pawh Rashtrapati Bhavan-ah Bristish roreltute lim te dah reng an la nih thu sawiin, India mi hruaitu ropuiten chawimawi an hlawh tawk lo a, hmun pek an ni lo tih a sawi.

Modi chuan India ram chuan colonial rule hunlai rilru a kalpel tawha, India mi ropui leh culture te a ngaihlu tawh a ni, a ti. "Rajagopalachari hi thuneihna chelhtu ni ringawt loin, mipui tana rawngbawltu a ni. A hnathawh leh dawhtheihnate, a ngaihtuahna ropui takte chuan tun thlengin mi a la hneh em em reng a ni," tiin a sawi.

Vawiin aṭanga March 1 thlengin Rashtrapati Bhavan-ah Rajagopalachari-ah a chanchin, ram tana a hnathawh hrang hrangte pholanna, exhibition buatsaih a ni dawn bawk. PM chuan a chanchin chiang zawka hre tura he hun buatsaih hi tlawh turin mipui a sawm nghal a ni.