Interim trade deal chungchanga inbiak hun tur sawn

India leh US chuan insumdawn tawnna tura inremna lailawk siam, interim trade deal tihfelna tur inbiakna neih leh hun tur an sawn. Ruahman lawk ang chuan inbiakna hi vawiin hian neih tura tih a ni a; mahse, an sawn a, a hun tur erawh an la sawichiang lo.

India-US trade deal tifel tur hian US Supreme Court thupek tihchhuah chungchang zirchian a nih hnuah India team chuan US an pan chauh dawn nia tarlan a ni. Ram pahnihte remchan dan angin a hun pawh hi ruat a la ni ang.

US Supreme Court chuan Zirtawpni liam ta khan US president Donald Trump-a'n ram dangte laka chhiah lakna tur a siam chu a hnawlsak sak a, executive branch ram dang laka chhiah lak dan tura emergency power a hmang a ni, an ti. Trump-a'n ram hrang hrang bungrua an chawk luh aṭanga chhiah lak a tum dan chu 1977 law,International Emergency Economic Powers Act (IEEPA) hnuaiah phal a ni lo tiin an sawi bawk. Court thupek hian Trump-a'n chhiah lak tur a ruahman zawng zawng a huam lo a, mahse a tam zawk erawha huam thung.

India leh US hian insumdawn tawnna tur, trade deal atan hian inremna lailawk an siam tawh a, mahse tihfel a la ni lo. Inbiakna neih leh hunah tihfel tura ruahman a ni a, hemi atan hian February 23 aṭang hian ni thum chhung meeting neih leh tura tih a ni.

Trump chuan Supreme Court thutlukna tihchhuah a nih hnuah, India-US trade deal chungchangah tihdanglam a awm dawn lo tih a sawi. India chuan chhiah lak zat tura a lo siam tawh chu a pe chhunzawm dawn a, US chuan chhiah a chawi ve dawn lo tih a sawi. Trade deal atana inremna lailawk an siamah, India chuan US-a bungrua a thawn luhah chhiah 18% a chawi ang a, US aṭanga bungrua chawk luhah chhiah lak a ni dawn lo thung.