ECI-in state 17 leh UT 5-te SIR kalpui tura inpeih turin hriattir

Ram chhung state ṭhenkhata kalpui tawh leh kalpui mek, voter list ennawnna Special Intensive Revision(SIR) chu state leh UT 22-ah April aṭanga kalpui ṭan a ni ve leh dawn tih Election Commision of India chuan a puang. ECI hian Ningani khan hemi atana in buatsaih tur hian state chhunga inthlan lam kaihhnawiha thuneitute chu inbuatsaih tur hian a hriattir a ni.

SIR kalpui la hmabak, State leh UT zingah hian Andhra Pradesh, Arunachal Pradesh, Chandigarh, Dadra and Nagar Haveli and Daman and Diu, Haryana, Himachal Pradesh, Jammu and Kashmir, Jharkhand, Karnataka, Ladakh, Maharashtra, Manipur, Meghalaya, Mizoram, Nagaland, National Capital Territory of Delhi, Odisha, Punjab, Sikkim, Tripura, Telangana, leh Uttarakhand-te an tel.

ECI lehkha chhuahah hian state leh UT 22-a chief electoral officer-te chu SIR kaihhnawih hna buaipui ngai hrang hrangte chu a rang thei anga tifel tura hriattir an ni a; hna thawh lawk ngai zingah kum 2002-2004 electoral roll-a voter awmte mapping tih a ngai dawn a, heng bakah booth-level officers (BLO) te hnena SIR kalpui a nih dan tur zirtirna neihte a ngai dawn bawk a ni.

SIR kalpuina hi Bihar-ah neih hmasak ber niin assembly inthlan hma lawka neih a ni a, sawisel pawh a tawh phah nasa hle. Hemi hnu hian ram puma neih chhunzawm a nihna turin State leh UT 12-ahte kalpui leh a ni a, kalpui a nih tawhna zingah Uttar Pradesh chu hun pawhseisak ngun ber an ni . Hetih laiin Assam-ah erawh 'National Register of Citizens' tihfel loh avangin SIR aiah special revision chauh neih a ni thung.