PM Modi ni hnih cham turin Israel-ah zin dawn

Prime minister Narendra Modi chu February 25-ah ni hnih chhung cham turin Israel-ah a zin dawn. Modi-a zin tur thu hi Israel prime minister Benjamin Netanyahu chuan Pathiannia Conference of Presidents of Major American Jewish Organisations neihnaah a sawi chhuak a ni. Modi hian Israel hi a tlawh vawi hnihna tur niin, a cham chhung hian Israeli Knesset (parliament)-ah thusawina hun a hmang nghal bawk ang.

PM Modi hi Israel-ah hian cham rei dawn lo mah se nghawng thuk tak a neih rin a ni. Netanyahu nen ram pahnih thawh dunna hrang hrang an sawi bakah, thawh dunna neih mekte pawh an thlir let nghal ang. Netanyahu chuan India chu khawvel huap pawha ram lar leh thil tihtheihna nei ṭha a nih mek thu a thu sawinaah hian a sawi lang a ni.

India leh Israel hian thawh dunna tur, Bilateral Investment Treaty(BIT) an ziah fel tawh bakah nikum November khan defence, industry, leh technology huanga thawh dunna tur leh technology lam chawi lara tihhmasawnna tur leh siamchhuah kawnga thawh dunna tur inremna an lo ziak fel tawh bawk.