France President Macron ni li cham turin India rawn thleng

France president Emmanuel Macron leh a nupui, first lady Brigette Macron-te chu Thawhṭanni khan India-a AI summit hmanga ni li chhung cham turin India an rawn thleng. Macron hian India a tlawh vawi lina a ni a, official eng emaw zatin an rawn zui a ni.

President Macron leh prime minister Narendra Modi te chu Mumbai-ah an inkawm nghal a, ram pahnihte thawh dunna tur hrang hrang hrangah inbiakna neiin, Memorandum of Understanding (MoU) pawh an tifel nghal bawk. Inbiaknaah hian film industry huanga thawh dunna siam dan tur pawh an sawi dun a ni. Hruaitu pahnihte hian thu an sawi ve ve bawk.

PM Modi leh president Macron-te hian Thawhṭanni vek khan India-France Innovation Forum-ah thu sawi ve vein, 'India-France Year of Innovation 2026' an tlangzarh dun nghal a ni. He hunah hian pahnih aṭanga sumdawn liante, start-ups, researcher, leh innovators eng emaw zat an tel.

India-France Annual Defence Dialogue vawi rukna chu nimin khan Bengaluru-ah neih a ni bawk a, defence minister Rajnath Singh leh France minister for armed forces and veterans affairs Catherine Vautrin-te'n meeting hi an kaihruai dun a ni. Meeting-ah hian defence huanga thawh dunna neih tawh thlir letna an neih rualin, thawh dunna huang zauhna turin industrial lama inbiakna neihte thlurbing a ni.