Ni 5 awh tur AI Impact Summit ṭan a ni

Artificial intelligence Impact Summit 2026 chu nimin tlai dar 5 khan prime minister Narendra Modi'an Bharat Mandapam, New Delhi-ah hawngin ṭan a ni. Ni nga awh tur summit-ah hian AI huanga mi pawimawh tak tak -innovator, startup, industry hruaitu, leh public institution hrang hrangte an fuan khawm beisei a ni a, summit hi February 20, Zirtawpniah a ṭiak ang.

Khawvel huap AI summit hi Global South huam chhunga huaihawt vawi khatna a ni a, Ministry of Electronics & IT (MeitY) buatsaih niin Software Technology Park of India in a buaipui a ni. Summit-ah hian 'People, Planet and Progess' chu innghahna ban pawimawh atana hman a ni a; ram hrang hrang 100 chuang aṭangin Seven Chakra (working group) AI hmasawnna thlen thei tur siam a ni bawk.

Summit hi nimin a khuh hawn a nih rual hian thupui pawimawh leh policy chungchang chu mithiam rualten an sawi ho nghal a ni. Vawiin, a ni hnihnaah hian 'Knowledge Compendiums' chu tlangzarh a ni dawn a, hemi chhungah hian hriselna, energy, education, lo neih, gender empowerment lama AI hman dante tarlan a ni ang. Vawiin vek hian 'Applied AI' chunchangah seminar leh Expo huaihawt a nih bakah Sushma Swaraj Bhawan-ah 'AI by HER: Global impact Challenge' neih a ni dawn a, AI huanga khawvela hmeichhe hmingthang leh thiam bikte chawimawina hlan nghal a ni ang.

Ni thumnaah 'Research Sumposium' buatsaih a ni dawn a, khawvel huapa hruaitu thiam bikte'n finfiahna neihsa aṭanga hmachhawpte leh thiamna tharte hman dan an sawi ho ang. Summit ni lina hi diplomatic and commercial peak, inremna leh sumdawnna lam atana hman a ni dawn a; ram hrang hrang aṭanga tel hruaitute chuan 'Leaders Plenary' hun an nei ang. Hei bakah ram hrang hranga CEO-te, sumdawng liante, investor-te, leh policy duangtute'n inkawmna neiin, summit tawpni hian GPAI Council meeting chu headline a ni dawn bawk.