Air India tlak chhanah pilot 'tihluih' tih hmuchhuak

Air India thlawhtheihna, nikum June-a chetsualna thleng chhui chianna report thar ber tihchhuahah, thlawhtheihna chetsual chhan chu khawl lam fel loh vang ni loin, pilot-te tihluih(intentional act) vanga thleng a nih thu Italian daily news, Corriere della Sera chuan a tarlang. Chhiatna thleng avang khan mi 260 an thih phah a, India rama kum 10 chhunga thlawhtheihna chetsualna rapthlak ber nia chhal a ni bawk.

Italy news report-in chhiatna thlen chhan an tarlan chungchangah hian ram chhunga thlawhtheihna enkawltu, Directorate General of Civil Aviation(DGCA) chuan engmah an la sawi lang ve lo thung. DGCA hian he chhiatna thleng a chhuina final report an la tichhuak ve lo a ni. Corriere Della Sera report chuan thlawhtheihna engine-a fuel cut-off a awm chu khawl lam chiang lo avanga thleng a nih loh thu leh, pilot-te ngeiin an duh reng avanga cut-off a nih thu an tarlang a ni.

Official lam chuan US expert-te puihna hmanga chhuichianna an kalpuiah final report chu draft tura puahchah mek a nih thu an tarlang. India-a Aircraft Accident Investigation Bureau (AAIB) in nikum July-a zirchianna hmasa a tihchhuahah khan thlawhtheihna chu a thlawh chhuah veleh khan fuel control-na chu "run" aṭangin "cut-off"-ah a in thlak niin an tarlang. Hei bakah hian cockpit inbiakna record aṭangin, pilot pakhat zawk chuan pilot dang hnenah hian fuel- chu eng vanga cut-off nge a nih tih zawt lai hriat tur a awm tel bawk.