LS Speaker lakah 'No-confidence Motion' theh lut

Parliament lower house, Lok Sabha-a rorelna mumal kalpui hleih theih a nih loh mek karah eptu pawl, Congress kaihhruai chuan nimin khan speaker Om Birla lakah rin tawk lohna 'No-confedence Motion' an theh lut fel ta. Lok Sabha-a Congress chief whip Kodikunnil Suresh leh party whip Mohammed Jawed Ahmed-te chuan Secretary-General Utpal Kumar Singh hnenah notice hi an theh lut a ni.

Congress pary hian speaker Birla chu Lok Sabha-a Leader of Opposition Rahul Gandhi ngaihthah leh ngai pawimawh lo zawnga a khawsak avang leh, house chhungah pawh ṭawng ve a phal sak loh avang te, debate neih a phalsak ve loh avangin motion hi an pu lut a ni. Hei bakah hian speaker hian LS-a eptu pawl MP pariat ngawt chu suspend tawhin an zinga pasarihte hi Congress party member an ni bawk.

Motion theh lut tur hian MP 100 talin an hming an ziah hnan a ngai a, hetih laiin nimin a motion theh luh a nih theihna tur hian MP 119 laiin an hming an ziak. Hming ziak zingah hian Congress, RJD, Samajwadi Party, DMK leh Left party member te an tel. Trinamool Congress MP-te erawh chuan an hming an ziak ve lo. LoP Rahul Gandhi pawhin a hming a ziak lo bawk a ni.