India-in mamawhna ang zelin Venezuela leh ramdang oil lei inpeih

Sorkar laipui chuan energy lam mamawh phuhrukna turin Venezuela leh ram dang aṭanga crude oil la lut turin a inhawn reng thu a tarlang. Hemi chungchang hi US leh Delhi-in trade deal an siam hnua sawi chhuah ni mah se, sorkar laipui chuan Russia aṭanga oil lei tihtawp nghal vek tum lam ala sawilang lo.

Ministry of external affairs thupuangtu, Randhir Jaishwal chuan thuthar lakkhawmtute a kawmnaah,"Venezuela nen hian inzawmna hlun tak kan lo nei tawh ṭhin a, energy lamah pawh thawhdunna thui tak kan lo neih tawh avangin sum leh pai thila a hlawk dan azirin Venezuela leh hmun dang aṭang pawha crude oil lak luh theih dan kawng zawn chu kan la inhawng reng a ni," a ti.

Jaiswal chuan Venezuela chu hun rei tak aṭang tawha energy partner a nih thu leh, sumdawnna leh investment thlenga an lo thawhpui ṭhin tawh a nih thu a sawi lang bawk. India hian kum 2019-20 chhung khan Venezuela aṭang hian crude oil lei ṭhin niin US lamin hrekna a tihchhuah avangin a titawp a, kum 2023-24 khan lei leh niin US hrekna vang bawk hian tihtawp a ni leh bawk.

US president Donald Trump-a'n India-in Russia oil lei a tihtawp tir anga a lo chhal tawh chu Jaiswal hian chhangin, India chuan energy chawk luh chu ramin a mamawhna ang zela thutlukna siam ṭhin a nih zawk thu a tarlang.