Operation Kiya hlawhtling takin kalpui; firfiak pawl mi leh sa 2 kap hlum

Indian Army te'n nimina Jammu And Kashmir-a 'Operation Kiya' an kalpuinaah Pakistan-a Jaish-e-Mohammad firfiak pawl mi leh sa pahnih an kap hlum niin official chuan an tarlang. J&K police leh Central Reserve Police Force thawk dun chuan Basantgarh area, Udhampur district huamchhungah beihpui hi an thlak a ni.

Sipaite hian zankhuaa beihpui an thlak hnuah leh drone-te hmanga hma an lak chhunzawm reng hnuah firfiak pawl mi leh sate hi an tawmna puk chhungah luhchhuah an ni a; hemi hmunah vek hian kah hlum nghal an nih thu an sawi. Intelligence aṭanga an thu dawnte an bawhzui hnuah beihpui hi thlak a ni a, firfiakte hi an bikbo hlen lohna turin an awmna chheh vel hi hneh taka thunun a ni tih White Knight Corps chuan X-ah an tarlang.

Operation hlawhtlin theihna tur hian security force lam chuan drone bakah UAV leh surveillance hmanrua hrang hrang chu firfiak pawlte chevel chhui zui nan hian an hmang a ni. Video ṭhenkhat aṭanga a lan danin firfiak pawl puka biru, tlanchhe tur chu security force lam hian nangchinin an kap zui nghal a, pukah hian che thei loa an dan beh hnuah kahhlum an ni ta a ni.