Unau hmeichhe 3 in chhawng 9-na aṭangin an zuangthla; Online game an khelh nen inzawmna a nei em tih chhui mek

Uttar Pradesh-a Ghaziabad-ah unau hmeichhe pathum, kum 12, 14 leh 16 mite chu an chenna in, in chhawng kuana aṭangin an zuang thla a, an vaiin an thi. An ruang hi post mortem tura lak niin, police-te chuan mahni intihlum niin an ngai.

Shalimar Garden ACP, Atul Kumar Singh chuan he thil thlen hun hi zing lam dar 2:30 vel niin a sawi. Room tukverh aṭangin a mal te tein an zuangthla niin a sawi. Thil thleng hriat a nih veleh police-te hriattir nghalin, Loni-a Joint Hospital panpui an ni a, mahse, chhan hman an ni tawh lo.

Report chuan unau pathumte hian Korea task-based gaming an khel nasain an atchilh niin an sawi. An game khelh ṭhin hi in chhawng sang aṭanga an zuanthlakna chhan a ni thei em tih chhuichian mek a ni. An mobile phone pawh police-te chuan lain an app hman ṭhin te, chat history leh online contact an neihte an chhui chiang mek. Tuin nge online game an khelh ṭhin chu kawhhmuh tihte hriat chhuah an tum a ni.

Hmeichhe naupang pathumte hi Covid-19 hri len hnuah sikul an kal chhunzawm tawh lo nia sawi a ni a, a upa ber kum 16 mi pawl 4 thleng chauh a kal hman a ni. An milai, kum 14 mi hi an hotu ber niin in chhawng aṭang an zuanthlakna turah pawh a ruahmantu ber nia an ngaih thu police-te chuan an sawi. Online game an khelh ṭhinah hian tihtur hrang hrang a awm ṭhin a, game-a tihtur awmte hi an unau hian an ti ho zel a, a tawpna ber final act ah hetiang thil hi a thleng ta niin an ngai a ni.

Naupangte pa, Chetan Kmawr chuan a fate hian Korean game an khel ṭhin a, an game khelhah hian tih tur 50 a awm a, a tawpna ber tur chu Thawhlehni khan a thleng tih chin an hriat thu a sawi. Naupangte hian an zuan thlakna bulah hian "Mummy Papa sorry" tih lehkha ziak an hnutchhiah.