CID-in Baramati-a thlawhtheihna tlak dan chhui

Maharashtra Crime Investigation Department (CID) chuan January 28-a Baramati, Pune district-a thlawhtheihna chetsual dan chu a chhui ṭan. Thlawhtheihna chetsualna thlengah hian Maharashtra deputy chief minsiter Ajit Pawar bakah mi dang pali an thi a ni.

Chetsualna thlen hnu hian Pune Rural police chuan Bharatiya Nagarik Suraksha Sanhita (BNSS) section 194 hnuaiah case an ziak lut a, hei hi CID kutah hlan chhawn a ni tih official chuan a sawi.

Kum 66 mi, Deputy CM leh Nationalist Congress Party (NCP) hruaitu ni bawk. Pawar leh mi dang pali chuanna, Learjet 45 thlawhtheihna hi January 28 zing khan Baramati pana a thlawk chu chesualin a tla a, a kang zui bawk. Chuang dangte hi pilot, captain Sumit Kapoor bakah co-pilot captain Shambhavi Pathak, Pawar-a personal security officer Vidip Jadhav leh flight attendant Pinky Mali te an ni. Ajit Pawar hi Ningani khan an khua, Baramati-ah sorkar chawimawina nen vui a ni a, a vuinaah hian union minister eng emaw bakah political party hrang hrang hruaitute an tel.

CID team hian Pune Rural police hnen aṭangin document pawimawhte an lakhawm dawn a, chetsualna thlenna hmun pawh an tlawh thuai dawn tih official chuan a sawi. Civil aviation ministry hnuaia Aircraft Accident Investigation Bureau (AAIB) pawhin thlawhtheihna thlen dan hi an chhui ṭan tawh bawk. Union civil aviation minister, K.Ram Mohan Naidu chuan thlawhtheihna black box hi hmuh a ni tawh tih sawiin, a chetsual chhan pawh hriat theih thuai beisei a ni, a ti.