Himachal Pradesh-ah vur a sur nasat vangin kawngpui khar

Himachal Pradesh state chhung hmun hrang hrangah vur a sur nasat avangin kar liam ta kartawp khan kawngpui 565 khar a ni a, heng zingah hian national highway pahnih a tel. Vur sur hian power pek chhuah lam pawh a nghawng buai a ni.

State Emergency Operation Centre (SEOC) chuan tirbal district - Lahaul leh Spiti te chu vur sur vangin harsatna an tawk nasa zual tih sawiin, kawngpui 292 a block a ni. Chamba district-ah kawngpui 105, Una-ah 70, Mandi-ahg 64 leh Sirmour-ah kawngpui 20 khar an ni bawk.

Vur sur hian power infrastructure lam pawh a nghawng buai a, transformer 4,797 te power pek chhuah a tibuai a, mi tam tak power supply neiloin an awm a ni.

Himachal Pradesh-ah hian tun thlasik chhunga a hmasa ber atan Zirtawpni khan vur a sur a, Manali bul Koahti khuaah sur nasa berin vur sur chhah lam hi cm 15 a tling. Lahaul leh Spiti district bakah Shimal district-ahte a sur nasa bawk. District thuneitute chuan vur tla thenfai hna thawk nghal a nih tih sawiin, mipuite chu loh theih loh a nih loh chuan zin chhuak rih lo turin an chah.

Meteorological department chaun January 26 zan aṭanga January 28 zing lam thleng ruah leh vur a la sur chhunzawm dawn tiin an sawi. Chamba, Kullu, Kinnaur leh Lahaul-Spiti district-ahte a nasa zual dawn nia sawiin orange alert an tichhuak. Una, Bilaspur, Solan leh Sirmaur district-ah rial a tla dawn bawk tiin, yellow alert an tichhuak bawk.

Khualzinte tlawh hmun lar zual - Shimla, Kufri, Narkanda, Naldehra, Manali, Solang Valley leh Sissu ah chuan vur leh ruahsur hi a ziaawm deuh dawn nia sawi a ni.