NGT-in Indore-a thil thleng chungchang chhui tur panel din

National Green Tribunal-a Central Zone chuan tun hnaiah Indore, Madhya Pradesh-a tui thianghlim lo in avanga mi tam tak kawṭha lo vanga an thih hnuah, hemi chungchang chhui chiangtu tur high-level committee a din.

Justice Shiv Kumar Singh (Judicial Member) leh Ishwar Singh (Expert Member) awmna NGT bench chuan Ningani khan green activist, Kamal Kumar Rathi-a'n Indore-a thil thleng chungchanga petition a thehluh an ngaihtuah, hemi hnu hian a hmun ngeiah kala thil awmdan chhui chiang turin member paruk awmna committee-a din a ni. Committee hi kar ruk chhunga report theh lut tura tih an ni bawk.

Petition theh luttu, Rathi chuan Indore-a tui thianghlim lo in vanga thihna leh, mi tam takin harsatna an tawh chungchangah state sorkar, Pollution Control Board leh local body-te mawh phurh tir turin a ngen. Bhopal dila faecal coliform (faecal bacteria) awm chu mihring tana hlauhawm, 1,600 ml a nih thu sawiin, tuichhe paihna line-te chuan tui thianghlim lakna line-te a tibawhhlawh pha a, hei hi Constitution-a Article 21 (right to protection fo life of citizen) bawhchhiatna lian tak a nih thu a tarlang.

Court chuan state pumah tui in tur thianghlim a awm theihna tura hma la tura hriattirin, tui quality record, tui pek chhuah dan leh harsatna chinfel dan tarlanna mobile app siam turin state thuneitute a hrilh bawk. Tuichhe paihna line leh tui thianghlim line-te hriat chianna turin GIS-based mapping siam vek tur leh, pipe-a leak a awm pawh siamṭhat vek a, dil leh tuichhunchhuah bul vela tui tibawlhhlawh thei thil awmte pawh paih bo vek turin a ti a ni.

Indore-a Bhagirathpura biala mi eng emaw zat thihna thlen phahna, tui thianghlim lo an in avanga kawṭha lo an neih phahna chhan hi tui lakna pipeline chungah tuichhe paihna line siam niin,hei hian an tui lak hi a tibawhhlawh ta niin an sawi.