Delhi court-in Lalu Yadav leh a chhungte thubuai siamsak

Delhi court chuan nimin khan Bihar chief minister hlui, Rashtriya Janata Dal (RJD) President Lalu Prasad Yadav leh a nupui Rabri Devi, an fate Tejashwi Yadav, Tej Pratap Yadav, Misa Bharti bakah an thawhpui mi dang eng emaw zat lakah Railways land-for-jobs scam kaihhnawihah thubuai a siamsak.

Rouse Avenue courts special judge (PC Act) Vishal Gogne chuan thubuai siamsakna tur thupek hi a tichhuak a ni.

Lalu Yadav hi Prevention of Corruption Act leh Indian Penal Code (IPC) hnuaiah thubuai siamsak a ni a, a chhungte hi mi bumnaa inhnamhnawiha puh an ni bawk.

He case hi Lalu Yadav union railway minister a nih lai, kum 2004-2009 inkara thleng a ni. Central Bureau of Investigation (CBI) in an chhui a ni. Yadav hian railway hnuaiah Group D hna pek tiamin ram lei tur hmuna ram neite chu an chhungkaw hnenah man tlawm tak takin a hralh tir a ni. Hna zawnglai leh an chhungte dang tam takin Lalu chhungkua bakah an thawhpui company-te hnenah sorkar hna duh hian an ram chu a hlutna aia hniam daihin an hralh a ni.

Dik lo taka ram lei a nih dana inhnamhnawha puh, la dam 98 zinga 46 te chu court hian thubuai a siamsak a, mi dang 52 te erawh thubuai siamsak an ni lo. Dan dik loa ram hralh hi Rs vbc 600 man vel niin an sawi.

Lalu Yadav leh a chhungte chuan an puhna hi thu dik lo, politics-a an beihna hmanrua niin an sawi ve thung.