January 28-ah Budget Session ṭan dawn

Cabinet Committee on Parliamentary Affairs chuan nimin khan kumin atana Parliament Budget session chu January 28 aṭangin neih a nih tur thu an puang a, union budget pawh February 1-ah pharh tura tih a ni bawk.

Tihdan phung pangngai angin president Droupadi Murmu chuan session ṭanni hian house pahnih joint sitting-ah thu a sawi ang. Beating Retreat ceremony hman tur avangin January 29-ah erawh house ṭhutkhawm a awm dawn lo thung. January 30-ah Economic survey pharh tum a ni a, January 31-ah Lok Sabha leh Rajya Sabha-ah ṭhutkhawm a awm dawn lo bawk.

Union Budget hi February 1, Pathianniah pharh a ni dawn a, Motion of Thanks sawi hona neih zawh a nih hnuah session hi February 13 aṭangin thla khat dawn chawlh lailawk a ni ang a, March 9-ah ṭan lehin April 2-ah session hi khar tum a ni.

Budget session chawlh lailawk awm tur hi Union ministry leh department hrang hrang hnuaia standing committee-te'n demand for grants an zirchian theihna tur atana tih a nih thu official chuan an tarlang.