NCB-in kum 2025 chhungin ruihhlo Rs vbc 2,000 hu man

Narcotic Control Bureau (NCB) chuan nikum 2025 chhung khan ram chhung hmun hrang hrang aṭangin ruihhlo kg nuai 1.33, Rs vbc 2,000 man hu an man bakah, kg 77,000 a rit Rs vbc 3,889 hu an tihchhiat thu Nilaini khan an tarlang.

Agency chuan nikum chhung vek khan ruihhlo tawlhrutu mi 994 an man a, thubuai 447 ziak lutin rampawn mi 25 an tel bawk. Thubuai 131 aṭangin mi 265 chu thiam loh chantir an ni a; an zinga 39 chu hrem theihna sang ber kum 20 lungin tang tura tih niin, mi dang 210 chu kum 10 leh a aia rei tang tura an chungthu rel a ni. Thiam loh chantir zinga pakuate chu ram pawn mi an ni a; focused approach kalpui a nih avangin kum 2024-a thiam loh chantir 60.8% chu kum 2025-ah 66.8%-in a pung niin agency chuan an sawi.

NCB ten Ruihhlo man beihpui thlak hna, nikuma an kalpui zingah hian 'Operation Crystal Fortress' pawh telin hemi ṭum hian high-quality methamphetamine kg 328 bawr chu an lo man tawh a ni. Hei bakah 'Operation Ketamelon' an kalpuina hnuaiah LSD blots 1,127; ketamine 131.66 gm; leh cruptocurrency Rs vbc 70 hute man a lo ni tawh bawk.

Agency hian nikum chhung vek khan state pali - Rajasthan, Maharashtra, West Bengal, leh Madhya Pradesh-ahte ruihhlo siamna hmun drug laboratory paruk an tichhe bawk. Heng Lab-te hian mephedrone, alprazolam, ketamine, leh a kaihhnawih dangte an siam ṭhin niin an tarlang.