EAM leh IEA Executive Director Birol inkawm

France leh Luxembourg tlawha zin chhuak mek, external affairs minister S. Jaishankar chuan Thawhṭanni khan International Energy Agency (IEA) Executive Director Fatih Birol kawmin, khawvel puma energy-a harsatna awm leh oil market leh nuclear power chungchangte an sawi dun.

Jaishankar hian France a cham chhung hian France foreign minister Jean Noel Barrot-te a kawm nghal niin MEA chuan a tarlang. Paris-a French-Indian Young Talents Program, Chambre de Commerce et d'Industrie Franco Indienne buatsaiha telte nen inkawmna hun a hmang nghal bawk.

Birol chuan social media kaltlangin Jaishankar nen inkawmna hlawk thlak tak an neih thu tarlangin, Jaishankar pawhin IEA Executive director Birol-an energy huanga India ṭhanna leh hmasawnna chu a thlawp thu a tarlang ve bawk. Jaishankar hian Luxembourg tlawhin foreign minister Xavier Bettel nen an inkawm leh dawn a ni.