India-in China sumdawng liante tan e-B-4 visa tlangzarh

India chuan e-Production Investment Business Visa, e-B-4 Visa tiha sawi bawk chu China sumdawng liante tan a tlangzarh. e-B-4 Visa hi January 1 khan tihchhuah ṭan niin embassy emaw agent emaw kal kher ngai loin online-a dil theih a ni. Visa dil a nih aṭanga ni 45 - 50 chhunga pek chhuah theih beisei a ni a, visa hmang hian a rei berah thla ruk chhung India-ah a cham theih dawn a ni.

e-B-4 Visa hi sorkarin China-a sumdawng liante tan a duan niin, sumdawnna thil buaipui ngaite tana hman ṭangkhai theih tura tih a ni. China sumdawngte chuan installation and commissioning, quality check and essential maintenance, production, IT and ERP ramp-up, training, supply chain development-te hmangin visa hi an dil thei dawn tih kaihhruaina siamah tarlan a ni bawk.

India leh China hian tun hnaiah inremna hrang hrang nei chhoin ram mipuite chhawr ṭangkai tam theih tur zawngin hma lak mek zel a ni. Visa chungchang tihfel a nih hma pawh hian lei lam aṭanga inkalpawhna tiawlsam turin Sipki La ramri dep inkalpawhna pawh hman a lo ni leh tawh bawk. Hei bakah thlawhtheihna service direct flight, khualzin phur leh bungraw phur chenin service tir a ni leh tawh a ni.