SC leh Bhutan SC-in MoU ziak

Chief Justice of India Surya Kant chuan nimin khan India Supreme Court leh Bhutan Supreme Court chuan dan hre mi naupang zawkte inchhawr tawn theihna tura inremna, Memorandum of Understanding (MoU) an ziak tih a puang. MoU hmang hian law clerk pahnih chu Bhutan aṭangin thla thum chhung supreme court-ah hian an thawk thei dawn a ni.

Bhutan aṭanga clerk rawn thawkte hian India mi clerk ang chiahin hna an thawh ve theih dawn bakah an veivahna senso pawh SC hian a tum sak vek dawn bawk. Law clerk pahnihte hian an thawh hun chhung hian court hrang hrangah an thawk thei dawn a, kum naupang leh fing tak takte an ni bawk niin CJI Kant chuan a tarlang.

Hmalakna thar hi ram pahnihten dan leh thupek chungchanga thawh dunna tihchakna atan leh, ram pahnih institution-te inkar thawh dunna tihhmasawnna atana ruahman a ni. Hetih mek laiin MoU ziah hian eng hun chhung nge a huam dawn tih tarlan a ni lo thung.