DM-in ‘Samudra Pratap’ lawng hlanna hun hmang

Defence minister Rajnath Singh chuan nimin khan Goa-ah pollution control vessel, ‘Samudra Pratap’ hlanna hun a hmang. Lawng hlan thar hi tuipui tibawlhhlawh thei hrang hrang tihtlemna atana hman tur niin, India Coast Guard-in ram chhunga siam hetiang lawng an hman hmasak ber tur a ni bawk.

Lawng thar hi tunlai hmanraw changkang ber ber hmanga duan niin, metre 114.5 a sei leh tonne 4,200 a rit a ni. Lawng hi tuipui-a oil bua hriat zung zung theihna tur a nih bakah, Exclusive Economic Zone (EEZ) leh a piah lam thlengin pollution awm chhan hrang hrang hmuhchhuah zung zung theihna tura duan a ni. Hei bakah hian tuipui huam chhunga venhimna kenkawh kawngah pawh nasa takin a pui tel thei dawn bawk.

Samudra Pratap hi ram chhunga duan leh siam vek niin polluiton piah lam search and rescue operatiom atan pawha hman theih tura duan a ni. Goa Shipyard Limited (GSL) chuan lawng siamna hna 60% chuang a thawk a ni. GSL hian nikum December khan Coast Guard hnenah an lo hlan fel tawh a, hman theiha hlanna hi kuminah neih theih a ni ta chauh thung.

Lawng thar hming Samudra Pratap hi 'Majesty of the Seas' tihna niin, Indian Coast Guard te'n harsatna an chinfel dan, him, felfai, leh nghet zawka an kalpui theihna lantir thei tura duan a nih thu thuchhuah siamah an tarlang tel bawk. Kochi-ah Coast Guard District Headquarters No. 4 (Kerala & Mahe) enkawlna hnuaiah a awm ang.