SIR data lakhawmtu BLO 50 thi tling tawh: TMC

West Bengal-a Bankura district-ah nimin Pathianni khan, Special Intensive Revision(SIR) data lakkhawm hna thawktu Booth Level Officer (BLO) chu thia hmuh leh niin SIR kaihhnawiha sorkar nawrna nasat vanga mahni intihlum ni a ngaih a ni. Trinamol Congress national general secretary Abhishek Banerjee chuan SIR data lakhawm tura nawrna nasa tak awm avang hian, state hrang hranga electoral roll ennawnna kalpuinaah thih phah 50 chuang an awm tling tawh niin a sawi lang bawk.

BLO Haradhan Mandal ruang hi Ranibandhan block-a sikul huam chhungah hmuh niin; police lam chuan a ruang bula lehkha hnutchhiah an hmuhah hian BLO hna nawrna chu a zo lo niin an tarlang bawk. Mandal hi zirtirtu niin Booth No. 206 huamchhung BLO hna a thawk niin police chuan an tarlanga; Mandal thihna chu kawng hrang hrang thlir chunga chhui chianna kalpui tum a nih thu an sawi.

SIR kalpui mekah data lakkhawm hna thawk tur hian sorkar hnathawk hrang hrang BLO tura ruat niin; data lakkhawm peihfel hun chhung tepter tak siam hmanga BLO-te nawr an nih avang hian SIR kalpuina hmun hrang hrangah BLO-te chuan harsatna an tawk nasa a; an harsatna tawhte hi an hna pangngai thawh tho angaih bakah datat lakhawm tura in nawrna sorkar aṭanga anasat vang niin report ṭhenkhat chuan an tarlang bawk.

Banerjee chuan SIR kalpui chu BJP sorkarin voter thenfaina atana an hman thu leh, party hlawkpui theih tura hmalakna mai a nih thu sawiin; an nawrna chuan BLO-teah manganna, chiaina, leh hah rimtawngna a thlen tih sawiin thawktute chu hun tiam hmaa an hna zawh fel loh chu, an hna chan phah thei dawn tiin vauna an tawk niin a sawi.