Parliament Winter Session a ṭiak ta

Parliament Thlasik ṭhut khawm (Winter Session) chu nimin khan khar niin, vice president CP Radhakrishnan chuan Rajya Sabha-ah kharna hun a hmang. Session neih chhunga sawi hona hun ṭha tak leh hlawhtling tak neih a nih vangin lawmthu a sawi nghal bawk. Lok Sabha pawh speaker Om Birla kaihhruaiin Vande Mataram play a nih hnuah tihtawp a ni ve bawk.

Session neih chhung hian parliament house pahnihah Viksit Bharat Guarantee for Rozgar and Ajeevika Mission (Gramin) (VB-G RAM G) Bill chu kum 20 chhung lo hman tawh MGNREGA thlakna tur hian pass ve ve a ni. Nimin khan Lok Sabha-ah MGNREGA thlakna tur bill hi eptu lamin an dodalna karah voice vote hmangin pawm a ni a, eptu pawlte chuan Ningani khan darkar 12 chhung VB-G RAM G bill duh lohna lantirin parliament complex-ah lungawi lohna lantirin zan lai thleng an pungkhawm a ni.

Session vawi 269-naah hian Rajya Sabha chu darkar 96 chhung mumal taka ṭhutkhawm niin, a hlawhtlinna hi 121% a tling a; vice president thar CP Radhakrishnan kaihhruaina hnuaia ṭhut khawmna hmasa ber a ni bawk. RS-ah hian bill pharh zinga pariat chu pawmin ngaihtuah zui leh tura ruahman a ni a; Lok sabha ṭhut khawm hlawhtlinna pawh 111% niin bill pharh zinga pariat chu pawm a ni ve bawk.