India sipai 2 Russia -Ukraine indonnaah thi leh

India sipai pahnih, Russia - Ukraine indonaa thite ruang chu Nilaini khan Delhi airport a rawn thleng. Kumin September aṭang khan Russia leh Ukraine indonaah hian India sipai pali an thih tawh bakah mi dang 56-te chu chin hriat lohin an awm mek bawk.

Indonaa thite hi Ajay Godara, Rajasthan leh Rakesh Kumar, Uttarakhand-a chengte an ni tih finfiah hnuah an ruang hi India-ah rawn thawn haw a ni. Godara leh Kumar hian student visa hmangin kum liam ta khan Russia an lut a, agent lam thil tihfel loh vangin dik lo takin Russia sipaiah dah luh an nih thu media lam chuan an tarlang.

Russia president Vladimir Putin-an thla tira India a rawn tlawh khan Nagaur, Rajasthan Lok Sabha MP Hanuman Beniwal chuan Russia-a India mi 61 dik lo taka sipaia ṭan tirte him taka thawn haw tur hian a lo ngen tawh a ni. MEA pawhin kumin September 11 khan dik lo taka sipaia inthun chu titawp turin India leh Russia thuneitute a lo hriattir tawh a ni.

MEA chuan ram mipuite chu hna dil theih hrang hrang tawktarha hman ṭhin laka fimkhur turin a lo hriattir tawh a, November 8 khan MEA thupuangtu chuan India mi 44, Russia sipaia ṭang mek an awm thu a tarlang.