Israel defence firm-in LMG 40,000 India-ah thawn dawn

Israel Weapon Industries (IWI) chuan nakkum kum tirah India sipai ralthuam lama thuam chakna turin light machine guns(LMG) 40,000 a thawh khatna atan an rawn thawn dawn tih an tichiang. Supply contract hi nikuma ziah fel tawh niin, ralthuam rawn thawn luh tur hi enchhinna paltlang vek tawh an nih bakah sorkar pawhin a endik vek tawh bawk.

Heng bakah hian IWI chuan ralthuam dang rawn thawnna tura contract lo ziah fel tawh hrang hrang chu a hmawr bawkna kalpui mek a nih thu an sawi. Ralthuam dang rawn thawn tur zingah hian new-age Close Quarter Battle (CQB) carbines nuai 1.7 a tel. He ralthuam rawn thawn tur hi Ministry of Defence’s (MoD) hnuaia India-in 5.56x45 mm carbines nuai 4.25 a lei tur hnuaia mi a ni.

Hetih laiin India-a ralthuam siamna, Bharat Forge chuan PLS System Adani Group hnuaia mi leh IWI thawh dunna hnuaiah 5.56x45 mm carbines hi 40% a siam ve dawn bawk. IWI hian tun hnaiah 'Make in India' hmalakna hnuaiah hian hna an lo thawk fo tawh a, hemi kaltlang hian PLR system pawh tualchhungah tam zawk siam chhuah theih a nih phah bawk.

India-in ralthuam tihhmasawnna tura hun rei tak a lo nghah tawh chu tun hnaiah a tihhlawhtlinna tur kawng a siam fel a; March 2020 khan MoD chuan Negev 7.62x51 mm LMG 16,479 leina tur contract, Rs vbc 880 hu a tifel thei. Hmalakna hmang hian ral hmatawngte thuam chak an ni thei dawn a ni.