Russia-in India-ah oil thawn luh chhunzawm dawn

India tlawha cham mek Russia president Valdimir Putin chuan nimin khan buaina leh harsatna awm loa oil thawn luh chhunzawm a tum thu a sawi. US-in India a nawrna karah Russia hian India-a oil chawk luh chhunzawm a nih tur thu hi a tichiang a ni.

Nimin khan prime minister Narendra Modi leh Putin-te hian India-Russia annual summit vawi 23-na hmangin an inkawm a ni.

Putin hian India hi Ukraine nen an indo hnuah a tlawh hmasak berna niin India nena thawh dunna tur hrang hrang sawi a nih bakah, thawh dunna lo neih tawhte thlirletna hun hman a ni bawk. Putin chuan India nen a thawh dunna chu tawp chin awm lo a kalpui zel a tum thu sawiin, energy huanga thawh dunna chu ram pahnih inkar tichaktu ban pawimawh tak a nih thu a sawi.

PM Modi pawhin Russia leh Ukraine buaina awm mekah India chu awn lam nei lo a nih loh thu sawiin, India chuan remna leh muanna chu an awn lam a nih thu a sawi. Remna leh muanna nghet tak hmanga buaina chinfel chu India duhber a nih thu sawiin, Putin pawhin Russia chuan chumi tur pawha hma a lak mek thu a sawi ve bawk.

Summit neihah hian Press Trust of India leh Russia news agency Tass chuan thawh dunna tur atana inremna an ziak a, inremnaah hian news content inthawn tawnna ṭha zawk neihte remtih a ni bawk. Inremna hi Vijay Joshi, PTI CEO leh TASS director General Andrey Kondrashov ten hming an ziak. India leh Russia chuan economic cooperation programme chu kum 2030 thlen neih dun an remti bawk a ni.