Delhi boruak bawlhhlawh vangin eptu pawlin lungawi lohna lan tir

Eptu pawl party hrang hrang hruaitute chuan nimin khan Parliament complex-ah, Delhi boruak bawlhhlawh zual zel vangin lungawi lohna an lantir. Congress hruaitu Sonia Gandhi chuan sorkar laipui chu boruak bawlhhlawh ti bo tura hma la turin a ngen a, eptu pawl hruaitute hian placard-te kengin Parliament kawt-ah hian aurualnate an nei bawk.

Lungawi lohna lantirte chuan prime minister Narendra Modi chu, boruak bawlhhlawh chungchangah thuchhuah siam ringawt loa hmalakna tak tak nei turin an phut tih an tarlang. MP pungkhawm zinga ṭhenkhat chuan boruak bawlhhlawh tihlanna tur hian hmai tuamna an vuah fur bawk.

Sonia Gandhi chuan," Boruak bawlhhlawh tihziaawm chu sorkar mawhphurhna a ni a, boruak bawlhlawh hi naupangin an thih pui bakah, keimah ang kum upa pawhin harsatna tam tak kan tawh phah a ni," a ti. Priyanka Gandhi Vadra pawh pung khawm zingah telin, boruak bawlhhlawh zual zel chungchang chu parliament-a sawi hona neih ngei a ṭul thu a tarlang zui a ni.

India khawpui bera boruak ṭhat lam tehna Air Quality Index chu nimin zing khan ziaawm hlekin 299-ah a tlanhiam ve tawh a, heti chuang hian 'poor' category-ah a la awm pha tho a ni. Delhi boruak bawlhhlawh hi Diwali hnu khan a chhe zual hle a, state ṭhenawm thlairo hal leh factory aṭanga boruak bawlhhlawh chhuakin a nghawng niin thuneitute chuan an tarlang bawk.