Parliament Winter Session vawiinah ṭan dawn

Parliamnet Thlasik ṭhutkhawm (winter session) chu vawiinah ṭan a ni dawn. Session ṭan a nih hma hian tihdan phung angin nimin khan all-party meeting koh a ni. Winter session hi kar thum chhung awh tura tih niin December 19-ah khar a ni dawn a, sitting vawi 15 awm hman tura ruahman a ni.

Nimina all-party meeting neihchu parliamentary affairs minister Kiren Rijiju chuan kaihruaiin, party hrang hrang hruaitute an tel. Eptu party Congress hruaitu Pramod Tiwari chuan "vote ruk" chungchanga BJP leh Election Commission a ruka an thawh dunna chungchang sawi rawt tum a nih thu a sawi a; Delhi bomb puak chungchang pawh sawi lan tum a nih thu a tarlang tel.

Sorkar chuan session-ah hian civil nuclear sector siam ṭhatna turin mimal tel ve theihna tur dan thar 'The Atomic Energy Bill, 2025' pharh a tum a, hemi bakah Higher Education Commission of India Bill leh draft legislation dang pariat pharh tum a ni bawk. Hetih laiin eptu party lam erawhin state leh Union Territory 12-a Special Intensive Revision(SIR) roll endikna kalpui chungchang sawi ho an ngiat rin a ni.

Bill pharh tura ruahman tawh Chandigarh Union Territory-a President thuneihna tihsanna tur chu party hrang hrang aṭanga dodalna a awm zui avangin hnuk kir a ni. National Highway siamna tur ram lak chungchang chak zawk leh langtlang zawka kalpui a nih theihna tur The National Highways (Amendment) Bill erawh pharh tel tum a ni thung

Winter Session neih chhung hian sorkar chuan Arbitration and Conciliation Act siam ṭhat a tum a, hemi ngaihtuah turin sorkar chuan committee-ah a thlen tawh bawk. Bill hlui pahnih session hmasa lama mi pawh ngaihtuah nawna pawm tur zingah telh a ni a, kumin atana supplementary Budget pawh agenda-ah hian telh a ni tih tarlan a ni bawk.