3rd India - Indonesia defence minister meet New Delhi-ah

India-Indonesia Defence Minister inbiakna ṭum thumna, India-Indonesia Defence Ministers’ Dialogue chu nimin khan New Delhi-ah neih a ni. Meeting hi defence minister Rajnath Singh leh Indonesia defence minister, Sjafrie Sjamsoeddin te'n an kaihruai dun a ni.

Minister pahnihte hian ramri venhimna chungchang an sawi dun bakah, kawng hrang hranga thawh dunna tur leh defence huanga thuk zawka thawh dunna turte an sawi dun.

Ram pahnihte hi hun rei tak aṭanga inlaichinna ṭha tak nei tawh niin, an inkar hi tun hnaia Comprehensive Strategic Partnership neih chuan a tichak zual bawk. Hei hian kawng hrang hranga thawhdunna a tihhmasawn bakah high-level engagement atan nasa takin a pui a; hemi kaltlang hian India's Act East policy pawh chak zawka kalpui theih a nih phah bawk.

Indonesia Defence Minister hi meeting hmanga ni hnih cham turin a rawn zin a, kumin January thla khan Indonesia President a lo zin tawh bawk.